صورة تعرفك اجزاء العين

دى شكل العين من الخارج وتحتها اجزاء العين الداخليه

1. الجفون 

2. بياض العين وبنسميه الصلبه لانه نسيج قوى بيحمى اجزاء العين الداخليه واهمها الشبكيه اللى بنشوف بيها

3. فيه طبقه شفافه وفيها شويه شعيرات دمويه اللى بتخلى العين تحمر احيانا. والطبقه دى بتغطى بياض العين وبعدين تلف وتغطى الجفون من الداخل . يعنى زى كيس بحيث لو دخل فى العين جسم غريب يبقى جوه الكيس وميقدرش يروح خلف كرة العين والطبقه دى اسمها اللحميه والدموع بتنزل فى الكيس ده وتغسل وتغذى العين وبعدين يا اما تنزل على الخدود او تروح فى فتحات تصريف الدموع اللى موجوده فى طرف الجفون من ناحية الانف.. شوف صورة غدة الدموع وجهاز تصريف الدموع اسفل.

4. سواد العين اللى هو الجزء اللى بيلمع زى الازاز هو ده القرنيه اللى فى الصوره وهى شفافه بحيث انك بتبقى شايف الجزء الامامى من كره العين من خلالها . يعنى زى ازاز الساعه لما بتبقى شايف وراه العقارب وكمان لون المينا او ارضية الساعه . بالضبط القرنيه بتشوف منها لون العين واللى هو سببه جزء فى العين اسمه القزحيه وفى وسط لون العين فيه دايره سوده اسمها بؤبؤ العين وهى عباره عن فتحه فى القزحيه بتوسع فى الضلمه وتضيق فى النور علشان تتحكم فى كمية الضوء اللى بيدخل العين ولا يضرها.

5. القزحيه بتمتد للخلف تحت الصلبه ويبقى اسمها المشيمه عباره عن اوعيه دمويه بتغذى الشبكيه اللى هى طبقه رقيقه جدا بتغلف الجزء الخلفى لكرة العين وبتكون تحت المشيمه (انظر الصوره)

6. شبكه العين دى عباره عن خلايا عصبيه بتستقبل اللى احنا نشوفه وتنقله من خلال العصب البصرى للمخ . والمخ يفسر اللى وقل له ويبعته لمركز الفهم عندنا فنعرف احنا شايفين ايه. 

7. خلف بؤبؤ العين الاسود والقزحيه فيه عدسة العين ودى شفافه برضه وعندها القدره تغير من شكلها علشان نقدر نشوف الحاجه بوضوح سواء قريبه او بعيده .

8. فى الصوره حتلاحظ ان فيه مسافه بين القرنيه والقزحيه دى اسمها حجرة العين الاماميه وبيكون فيها سائل بتفرزه غده داخل العين اسمها الجسم الهدبى . السائل ده عامل زى الميه وفيه مواد غذائيه للعين وبعدين عنده فتحات يخرج منها من داخل كرة العين لخارجها . واذا اتسدت الفتحات دى يرتفع ضغط العين وجه ممكن يدمر الشبكيه وعصب العين. 

9. فى الصورة برضك فيه مسافه بين عدسة العين والشبكيه وجى اسمها الحجرة الخلفية للعين فيها سائل لزج وشفاف زى بياض البيض وده بنسميه السائل اللزج او الجسم الزجاجى ووظيفته يحفظ العين على شكل كره وكمان يحافظ على الشبكيه فى مكانها ويمنع انها تنفصل .

دى اجزاء العين بشكل مبسط جدا. 

10. الصوره اسفل بتوضح الجهاز الدمعى للعين  

الغده الدمعيه: ودى لا نراها بالعين لانها تحت الجفن العلوى من ناحية الاذن وهى بتفرز الدموع علشان تغسل وتغذى العين. 

النقطه الدمعيه او فتحة ماسورة تصريف الجموع: دى فتحه على الحرف الداخلى لكل جفن لونها ابيض ومنها تدخل الدموع لانبوبه رفيعه داخل حرف الجفون وبعدين تتجمع فى الكيس الدمعى اللى برضه مستخبى بين العين وعضمة الانف ومنه تنزل الدموع بانبوبه وتصرف فى الانف من الداخل.

11. فيه 6 عضلات ماسكين فى كرة العين وبعدين ماسكين فى العضم اللى محاوط العين اللى بنسميه حجاج العين ودول بيحركوا العين فى كل اتجاه . انظر الصور اسفل

12. فى المسافه اللى بين كرة العين والعضم اللى حاوليها فيه دهون ودى هى اللى بتحمى العين من انها تتفتح نتيجه خبطه شديده زى لكمه او كره . يعنى بتعمل كانها سفنج بيمتص الصدمه الى حد ما.

يارب يكون الشرح سهل عليكم معرفة اجزاء العين 😊😊